Энэ хичээлийн жилийн элсэлтийн шалгалтыг орон даяар зургаадугаар сарын 18-21-нд явуулах юм. Харин монгол хэл, бичгийн шалгалтыг ирэх дөрөвдүгээр сарын 17-19-нд зохион байгуулахаар товлосон. Монгол хэл, бичгийн шалгалтын бүртгэлийг уржигдар эхлүүлсэн байна. Үүнтэй холбоотойгоор Боловсролын сайд П.Наранбаяр болон холбогдох албаныхан мэдээлэл өгсөн юм. Тэрбээр “Журамд нэмэлт, өөрчлөлт оруулах тухай 2025 оны хоёрдугаар сарын 14-ний А69 дүгээр тушаал гаргалаа. Үүгээр элсэлтийн шалгалтын шинэ журмыг 2026 оноос хэрэгжүүлэх байсныг 2028 он хүртэл хойшлуулсан. Мөн 10, 11 дүгээр ангийн сурагчдыг монгол хэл, бичгийн шалгалт өгөх боломжоор хангаж байна” гэв. Боловсролын үнэлгээний төвийн дарга Г.Гантуяа “10, 11 дүгээр ангийн хүүхдүүд ирэх дөрөвдүгээр сарын 17-19 нд зохион байгуулах монгол хэл, бичгийн шалгалт өгч болно. Хэрэв монгол хэл, бичгийн шалгалтын босго оноо 400-д хүрвэл энэ үр дүн нь насан туршид нь хадгалагдах юм. Өөрөөр хэлбэл, энэ оноогоо ашиглан ч элсэлтийн шалгалтыг хэзээ ч өгсөн нээлттэй гэсэн үг. Харин босго оноо даваагүй тохиолдолд 12 дугаар анги төгсөтлөө монгол хэл, бичгийн шалгалтыг дахин өгөх юм. Өөрийн хүсэлтээр эл шалгалтыг өгсөн тохиолдолд төлбөрийг нь эцэг, эх хариуцна” хэмээн тодрууллаа. Нэг шалгалтын төлбөрийн хураамж 10 000 төгрөг аж.
Ташрамд дуулгахад, 2026 оноос элсэлтийн шалгалтыг өмнөхөөс нь арай өөр агуулга, зохион байгуулалтаар явуулах талаар Боловсролын үнэлгээний төвөөс мэдээлж байсан юм. Тодруулбал, хүүхэд бүр суралцах чадварын болон ур чадварын шалгалтыг заавал өгөхөөр тусгасан байв. Ийм өөрчлөлт оруулахад бэлтгэл байдлаа хангах, сурах бичиг, сургалтын агуулгыг шинэчлэх зэрэг олон ажил хийх шаардлагатай байгаа тул элсэлтийн шалгалтыг ийнхүү 2028 он хүртэл хуучин журмаар нь явуулах болжээ. Энэ нь хүүхдэд ээлтэй шийдвэр хэмээн боловсролын байгууллагынхан тодотгов.
