“Про” театрын зургаа дахь уран бүтээл болж буй Францын алдарт зохиолч Александр Дюмагийн алдарт романаас сэдэвлэсэн "Шадар гурван цэрэг" физикл драмын жүжиг Монголд анх удаа олны хүртээл болох гэж байна.Физикл жүжиг гэдэг нь биеийн хэлэмжээр тухайн дүр, үйл явдлыг илэрхийлдгээрээ онцлог аж.
Ирэх гуравдугаар сарын 1-нд нээлтээ хийх тус жүжигт эрэлхэг зоригт Артаньян болон хүчирхэг шадар цэргүүд болох Атос, Арами, Портос нарын нэг нь нийтийн төлөө, нийт нь нэгийн төлөөх амьдрал, нөхөрлөлийн үнэ цэнийг чухамхүү эндээс мэдрэх болно гэдгийг уран бүтээлчид онцолж байгаа юм. Эдгээр дүрд С.Баянмөнх, З.Булган, О.Самданпүрэв, Б.Анхбаатар нар тоглоно. Жүжгийн найруулагчаар СТА О.Итгэл, ерөнхий продюсероор З.Нямзул нар ажиллаж байна.
Байгууллага, анги хамт олноороо үзэхэд тасалбарын хөнгөлөлт үзүүлж байгаа гэдгийг дуулгая.Тус театрын өнгөрсөн онд тоглосон Виктор Хюгогийн “Инээмтгий хүн” визуал драм, Гофманы “Щелкунчинк” буюу “Цөмөөхэй цэрэг ба Хулганы хаан” жүжгүүд сайн, чанартай бүтээлүүд болсныг үзэгчид хэлдэг юм.
Нэмэлт мэдээлэл хүргэхэд, "Про" театр"-ынхан “Шадар гурван цэрэг” физикл драмын жүжгийн төсвийн тодорхой хэсэг дээр #crowdfunding буюу Олон нийтийн санхүүжилт зарлалаа. Тодруулбал, үзэгч та зөвхөн энэ удаагийн уран бүтээл гэлтгүй өөрийн сонирхсон уран бүтээлдээ хөрөнгө оруулалт хийн дэмжсэнээр тус театрын хүндэт зочин болж, уран бүтээлүүдийг нь үзэхээс гадна бусад олон урамшууллын эзэн болох боломжтой юм байна.
