Налайх дүүргийн Эрүүл мэндийн төвийн удирдлагууд 300 гаруй ажилтныхаа нийгмийн даатгалын шимтгэлийг сүүлийн зургаан сарын хугацаанд төлөөгүй хохироож буй талаар эмч, мэргэжилтнүүд нь дуугарах боллоо. Тэд “Байгууллагаас эмч, ажилтнуудын нийгмийн даатгалын шимтгэлийг төлөхгүй байгаа учраас олонх нь зээл авч чадахгүй, өрөө ч төлж хүчрэхээ болиод удаж байна. Зарим нь жирэмсний болон амаржсаны тэтгэмжээ одоо болтол аваагүй. Даатгал төлөөгүй гээд эмнэлэгт ч үзүүлж чадахгүй олон сар явлаа. Энэ асуудлыг хэзээ шийдэж өгөх вэ. Сар шинийн баяр ойртоод хүн бүрд мөнгө хэрэгтэй байна. Эмч, ажилтан нийлсэн 300 гаруй хүний цалингаас нийгмийн даатгалын шимтгэлд сүүлийн зургаан сар 1.5 тэрбум төгрөг суутгасан. Энэ мөнгө хаачсан бэ” гэх зэргээр нийгмийн сүлжээнд бичиж байна. Энэ талаар удирдлагууд нь одоо болтол албан ёсны тайлбар хийгээгүй гэнэ.
Тэгвэл тус төвийн дарга Л.Байгал өчигдөр өөрийн цахим хуудсаараа дараах тайлбар мэдэгдлийг хийв. Тэрбээр “2021 оноос эхлэн Эрүүл мэндийн даатгалын ерөнхий газраас эмнэлгүүдэд эмчилсэн өвчтөний тоо, хийсэн оношилгоо, шинжилгээний гүйцэтгэлээр нь санхүүжилт олгож байгаа. Манай эмнэлгийн санхүүжилт сард 800 саяас 1.2 тэрбум орчим төгрөг байдаг ч энэ нь хоол, хүнс, эм, тариа, урвалж, ариутгалын бодис гэх мэт урсгал зардалдаа ч хүрдэггүй. Нэмээд, 2023 оны долоодугаар сараас хойш цалингаас өөр зардал гаргахгүй байсаар нийт гүйцэтгэл өр болж хуримтлагдсан. Тэтгэвэр, тэтгэмж, листний мөнгө нь тухайн хүний сүүлийн сарын даатгалын шимтгэлээр биш, ажилласан жилээр нь буюу улсад төлсөн нийт татвараас нь олгодог гэж боддог. Манайх Сангийн яамнаас өгсөн эрхийн хэмжээнд нийгмийн даатгалын шимтгэл, ХАОАТ, эмийн болон хоол, хүнс, ариутгал халдваргүйтгэлийн бодисын татвараа төлж байгаа. Гэхдээ өртэй, энэ салбарт өргүй байгууллага ч цөөхөн. Дүүргийн Нийгмийн даатгалын хэлтсийнхэн жирэмсэн, амаржсаны тэтгэмж олгохгүй барьцаалж буй л болохоос ажилтнууд байгууллагаасаа цалингийн болон хэрэглээний зээл авдаг. Санхүүжилт хүрэхгүй байгаа учраас өр талбөрөө бага багаар барагдуулаас өөр аргагүй. Тухайн сарын санхүүжилтийн 80-90 хувийг цалинд, үлдсэнийг нь эм, урвалж, хоол, хүнс гэхчлэн хувааж зарцуулдаг. Шимтгэлд суутгасан гээд буй 1.5 тэрбум төгрөгийг хүссэн нь зарцуулдаг юм биш. Эхний цалингаас суутгасан мөнгөөрөө дараагийн сарын цалингаа тавиад, үлдсэнээр нь бусад өрөө дарж байгаа гэж ойлгоорой. Эрүүл мэндийн салбар сүүлийн хоёр жилд ийм л нөхцөл байдалтай байгаа” гэв.
О.Оргилох
https://www.unuudur.mn/a/273813
