Мал амьтны гоц халдварт шүлхий өвчнөөс урьдчилан сэргийлэх вакцинжуулалтын сарын аян улс орон даяар эхэллээ. Аяны хүрээнд Орхон аймаг 1000 гаруй өрхийн 24499 үхэр, 300 гахайд шүлхий өвчнөөс урьдчилан сэргийлэх вакцин хийнэ. Өнөөдрөөс эхлэн Мал эмнэлгийн газрын мэргэжилтнүүд долоон чиглэлд гарч вакцинжуулалтын ажлыг эхлүүлж байгаа бөгөөд тэдэнд шаардлагатай 24500 тун вакцин, малын эмч нарт нэн хэрэгцээтэй байсан таблет зэргийг аймгийн удирдлагууд гардуулан өглөө.
Ийнхүү хувийн хэвшлийн долоон мал эмнэлгийг таблетаар хангаснаар малчны хотноос мал эмнэлгийн нэгдсэн системд холбогдож, шаардлагатай бүхий л бүртгэл мэдээллийг газар дээрээс нь хийх боломж бүрдэхээс гадна Мал эмнэлгийг цахимжуулах ажлын эхлэл тавигдаж байгаа юм.
