Баян-Өлгий аймгийн Ус, цаг уур, орчны шинжилгээний төвөөс гаргасан энэ сарын 2-6-ны өдөр хүртэлх 5 хоногийн цаг агаарын урьдчилсан мэдээгээр тухайн хугацаанд ихэнх нутгаар салхи, шуургатай байх төлөв ажиглагджээ.
Хугацааны эхэн болон дундуур аймгийн ихэнх нутгаар хур тунадас орно. Энэ сарын 2,3-ны өдрүүдэд салхины хурд шөнөдөө 14-16 м/с, өдөртөө 18-20 м/с, зарим үед 22 м/с хүрч ширүүсч шороон болон цасан шуурга шуурна. Бусад хугацаанд салхины хурд 3-8 м/с байх аж.
Агаарын температур нийт нутгаар шөнөдөө 3-8 градус хүйтэн, өдөртөө 0-5 градус дулаан, энэ сарын 4-ний өдрөөс эрс хүйтэрч шөнөдөө 8-13 градус, өдөртөө 5-10 градус хүйтэн байх төлөвтэй.
Иймд цаг агаарын аюул үзэгдлээс сэрэмжтэй байхыг малчид болон иргэд, тээвэрчдэд анхааруулж байна.
