Өнөөдөр Нийгмийн даатгалын тэтгэвэр, тэтгэмж олголтын өдөр. Нийт 446.4 мянган иргэнд 185 тэрбум төгрөгийн шилжүүлгийг 6 банкаар дамжуулан гүйцэтгэж байна. Эдгээрээс 353.5 мянга нь өндөр насны тэтгэвэр, 71.9 мянга нь хөгжлийн бэрхшээлтэй иргэн, 21 мянга нь тэжээгчээ алдсаны тэтгэмж хүлээн авах юм. Аймаг орон нутагт 58.6 хувь нь буюу 41.4 мянган иргэн нийслэлд оршин суугчид.Орон нутгийн хувьд дараалал үүсэх нь харьцангүй гайгүй учраас ХНХЯ-наас нийслэлд ихээхэн ач холбогдол өгч ажиллажээ. Бараг 100 мянган хүлээн авагч банкны картгүй тул банкуудтай хамтран дансжуулж, картжуулах ажил зохион байгуулж байна.
Өнөөдрийн байдлаар 32.1 мянган карт хэвлүүлж амжсан, түгээлт хийгджээ. Одоо иргэдийн бөөгнөрөл үүсгэхгүй, эмх замбараагүй байдал үүсгэхгүй, халдвар хамгааллын дэглэм сайн сахиулж иргэдэд үйлчлэхэд банкууд болон хүчний байгууллага, онцгой, мэргэжлийн хяналтын байгууллагуудтай хамтран бүрэн бүрэлдэхүүнээрээ ажиллаж байна.
Ташрамд анхааруулахад, тэтгэврийн зээлтэй иргэдийн хувьд тухайлбал, Төрийн банкинд 22 мянган иргэн тэтгэврийн зээлтэй байгаа юм байна. Тэдгээр иргэд өнөөдөр ямар нэгэн хүсэлт ирүүлэхгүй бол орой гэхэд суутгал хийгдэнэ. Хэрэв иргэн өөрөө мэдээгүйгээс суутгал хийгдсэнийг буцаах хүсэлт гаргавал банкны зүгээс буцаалт хийх боломжтой гэдгийг албаны эх сурвалж мэдээллээ.
