Нийслэлд орон сууцны үнэ өсөх хандлага үргэлжилж, өнгөрсөн нэг жилийн хугацаанд хуучин орон сууцны үнэ шинэ байрныхаас илүү хувиар нэмэгдсэн байна. Тодруулбал, хуучин байрны үнэ жилийн хугацаанд 7.3 хувиар өссөн бол шинэ орон сууцных 4.9 хувиар нэмэгджээ.
Үндэсний статистикийн хорооны мэдээллээр, 2026 оны аравдугаар сарын байдлаар Улаанбаатар хотын орон сууцны үнийн индекс 1.48-д хүрсэн байна. Энэ нь өмнөх оны мөн үеэс 6.8 хувиар, өмнөх сараас 0.5 хувиар өссөн үзүүлэлт юм.
Орон сууцны үнийн өсөлтийг шинэ болон хуучин байр гэж ангилан авч үзвэл, жилийн өөрчлөлтөөр хуучин орон сууцны үнэ илүү өндөр өсөлттэй гарчээ. Харин сарын өөрчлөлтөөр шинэ орон сууцны үнэ хуучин байрныхаас илүү нэмэгдсэн байна.
Тодруулбал, шинэ орон сууцны үнэ өмнөх оны мөн үеэс 4.9 хувиар өссөн бол өмнөх сарынхаас 1.3 хувиар нэмэгджээ. Харин хуучин орон сууцны үнэ жилийн хугацаанд 7.3 хувиар, сарын хугацаанд 0.4 хувиар өссөн байна.
Энэ үзүүлэлтээс харахад сүүлийн нэг жилийн хугацаанд хуучин орон сууцны үнийн өсөлт илүү өндөр байсан бол 2026 оны аравдугаар сард шинэ орон сууцны үнэ сарын дүнгээр илүү эрчимтэй нэмэгджээ.
НЭГ МЕТР КВАДРАТ БАЙРНЫ ҮНЭ 4.8-4.9 САЯ ТӨГРӨГТ ХҮРЭВ
Орон сууцны үнийн өсөлтийг нэг метр квадрат талбайн дундаж үнээр авч үзвэл шинэ болон хуучин байрны үнэ хоёулаа таван сая төгрөгт ойртсон байна.
Тодруулбал, 2026 оны аравдугаар сарын байдлаар шинэ орон сууцны нэг метр квадрат талбайн дундаж үнэ 4.83 сая төгрөгт хүрчээ. Дүүргүүдээр харьцуулбал Сүхбаатар дүүрэгт хамгийн өндөр буюу нэг метр квадрат нь дунджаар 5.50 сая төгрөгийн үнэтэй байна.
Шинэ орон сууцны үнийн жилийн өсөлтийг дүүргээр нь авч үзэхэд Сонгинохайрхан дүүрэгт хамгийн өндөр буюу 3.0 хувиар нэмэгджээ. Энэ нь шинэ орон сууцны үнийн өсөлт бүх дүүрэгт ижил түвшинд байгаагүйг харуулж байна.
Харин хуучин орон сууцны нэг метр квадрат талбайн дундаж үнэ шинэ байрныхаас өндөр буюу 4.94 сая төгрөг болсон байна. Тус үзүүлэлтээр мөн л Сүхбаатар дүүрэг тэргүүлж, нэг метр квадрат талбайн үнэ дунджаар 5.97 сая төгрөгт хүрчээ.
Хуучин орон сууцны үнийн жилийн өсөлт дүүргүүдийн хувьд харилцан адилгүй байсан бөгөөд Баянзүрх дүүрэгт хамгийн өндөр буюу 7.5 хувиар нэмэгдсэн байна.
