Беларусь улсын МАЗ үйлдвэрийн Зам засвар арчлалтын 42 машин механизмыг АЗЗА байгууллагуудад хүлээлгэн өглөө.
Монгол улсын Засгийн газар болон Бүгд найрамдах Беларусь улсын Засгийн газар хооронд 2019 оны 04 дүгээр сарын 19-ний өдөр байгуулсан Экспортын зээлийн ерөнхий хэлэлцээрийн хүрээнд тус зээлийн санхүүжилтээр Монгол Улсын Засгийн газрын 2020 оны 131 дүгээр тогтоолоор “МАЗ-ын авто замын засвар, арчлалтын 42 ширхэг машин механизм нийлүүлэх төсөл”-ийг амжилттай хэрэгжүүллээ.
Төслийн хүрээнд Беларусь Улсын “МАЗ” Хамтарсан хувьцаат компанийн үйлдвэрлэн гаргаж байгаа авто замын нүхэн засварын битум эмульсийн технологид суурилсан автомашин 21 ширхэг, хосолмол ажиллагаатай тусгай зориулалтын тоноглол бүхий автомашин 21 ширхэг нийт 3,3 сая еврогийн өртөг бүхий 42 ширхэг машин, механизм тоног төхөөрөмжийг зээлээр худалдан авч Олон улс, улсын чанартай авто замын засвар арчлалтын 20 байгууллагад хүлээлгэн өгөх ёслолын ажиллагааг 2021 оны 5 дугаар сарын 24-ний өдөр Зам, тээврийн хөгжлийн яаман дээр зохион байгуулагдлаа.
Тус нээлтийн ажиллагаанд Зам, тээврийн хөгжлийн сайд Л.Халтар, Бүгд найрамдах Беларусь улсаас Монгол улсад суух Онц бөгөөд бүрэн эрхт элчин сайд Станислав Владимирович Чепурной, Зам, тээврийн хөгжлийн төвийн захирал Р.Буд нар оролцож түлхүүрийг гардуулан өгөв.
Зам хариуцагч байгууллагууд нь олон улсад нэвтэрч байгаа сүүлийн үеийн дэвшилтэт техник технологи, хүчин чадал сайтай тусгай зориулалтын машин механизмаар хангагдаж, засвар арчлалтын чанар үр ашгийг дээшлүүлж, хөдөлгөөний аюулгүй байдал, ашиглалтын бэлэн байдлыг сайжруулахад үр дүнгээ өгөх юм. Тухайлбал битум эмульсээр зам нөхөгч автомашин нь авто замын хучилтад үүсээд байгаа нүхэн эвдрэлд зарцуулах хүн хүч, хүнд машин механизмын техникийн оролцоог багасгах, технологийн үе шатны ажлын дарааллыг хөнгөвчлөх, алслагдмал бүс нутагт түргэн шуурхай хүрч, чанарын өндөр түвшин гүйцэтгэж, цаг хугацаа хэмнэх давуу талтай юм.
Төслийн хүрээнд Беларусь улсын “МАЗ” үйлдвэрийн 2 инженер уригдан ирж нийлүүлэгдсэн машин механизмуудын угсралт, техник ашиглалтын онолын болон дадлага, сургалтыг “Зам, тээврийн хөгжлийн төв” ТӨҮГ дээр Авто зам, засвар арчлалтын байгууллагуудын инженер техникийн ажилтан, механизмчин, жолооч нарт зохион байгуулж, ашиглалтын гарын авлагыг орчуулан бэлтгэж хүлээлгэн өглөө.
