Улсын онцгой комиссын Шуурхай штабаас өнөөдөр ээлжит мэдээлийн хурлаа хийв. Хуралд цагдаагийн байгууллага, Консулын газар, Мэргэжлийн хяналтын байгууллага болон Шударга өрсөлдөөн хэрэглэгчийн төлөө газрын төлөөлөл оролцож, мэдээлэл өгсөн юм.
Тухайлбал цагдаагийн байгууллагаас Засгийн газрын тогтоол ба Улсын онцгой комиссын шийдвэрээр өндөржүүлсэн бэлэн байдлын хугацаанд цахим орчинд худал мэдээлэл тараасан, хорио цээр, хөдөлгөөнийг хязгаарлалтын дэглэм зөрчсөн 43 тохиолдлыг шалгаж, шийдвэрлэснээ танилцуулав.
Энэ талаар ЦЕГ-ын Нийтийн хэв журам сахиулах хэлтсийн дарга П.Эрдэнэбат "Цахим сүлжээнд тараасан 17 илт худал мэдээлэл байгаагаас нь 13-ыг нь Шударга өрсөлдөөн, хэрэглэгчийн төлөө газарт шилжүүлсэн. Дөрвөн зөрчилд цагдаагийн байгууллагаас холбогдох шалгалтын ажиллагааг хийж байна.
Зөрчил үйлдсэн нийт 34 хүнд 6,950,000 төгрөгөөр торгож, шийтгэл оногдууллаа.
Түүнчлэн Эрүүгийн хуулийн тусгай ангийн 13.14. Худал мэдээлэл тараах гэсэн зүйл заалтын дагуу гэмт хэргийн шинжтэй 14 гомдол мэдээллийг шалгаж байна.
Зөрчлийн зарим хэргээс дурдвал, Завхан аймгийн Их-Уул сумын Хужирт гэх газарт хоёрдугаар сарын 25-н буюу шинийн 2-ны өдөр нэр бүхий есөн хүн хурдан морины уралдаан зохион байгуулсан хэрэг гарсан. Үүнд Зөрчлийн тухай хуулийн дагуу нэр бүхий есөн хүнийг тус бүр 150 мянган төгрөгөөр торгосон" гэв.
