Цаг уурын байгууллагаас арав хоногт нэг удаа хээрийн цасны хэмжилтийн мэдээг олон нийтэд танилцуулдаг билээ. Энэ сарын 20-ны байдлаар нийт нутгийн 60 гаруй хувь нь цастай байна. Үүнээс Алтай, Хангай, Хэнтий, Хөвсгөлийн уулархаг нутаг, Тамсагийн хоолойгоор 20 см-ээс их, Завханы Нөмрөг, Сонгино, Цагаанчулуут, Отгон, Баянхонгорын Гурванбулаг, Баянбулаг, Галуут, Сэлэнгийн Ерөөд 22-32 см хүртэл зузаан цастай байгаа аж. Харин бусад нутагт цасны зузаан 1-10, гуу жалга, хунгарласан газартаа 50 см-т хүрчээ. Өнгөрсөн арав хоногт агаарын температур ихэнх нутгаар олон жилийн дунджаас дулаан, баруун аймгуудын зарим сумд дунджаас хүйтэн байжээ. Мөн нутгийн 90 гаруй хувьд хур тунадас дунджаас бага, 10 орчим хувьд нь дунджийн орчим буюу түүнээс ахиу орсныг цаг уурын байгууллагаас мэдээлэв. Ташрамд дуулгахад, Цагаан сарын шинийн 1-нд Улаанбаатар хотод ялимгүй цас орох нь. Өдөртөө 3-8 хэмийн хүйтэн байх ажээ.
