Мөрөн сумын ИТХ-ын ээлжит бус 17-р хуралдаан болж Засаг дарга Д.Идэрмөнх өөрийн хүсэлтээр чөлөөлөгдсөний улмаас сумын Засаг даргад нэр дэвшүүлэх асуудал хэлэлцлээ. Энэ үеэр АН-ын бүлгээс нэр дэвшүүлээгүй бөгөөд МАН-ын бүлгээс Х.Тайванбаярыг нэр дэвшүүлж нийт төлөөлөгч нарыг 98 хувийн саналаар Мөрөн сумын Засаг даргад батламжлуулах саналыг аймгийн Засаг даргад хүргүүлэхээр боллоо.
Х.Тайванбаяр нь МУИС-ийг Улс төр судлаач, Нийгмийн ухааны багш мэргэжлээр төгссөн. 2015-2017 онд МУБИС-д Боловсролын удирдлагын магистрын зэрэг хамгаалж, 2022 онд Эрдэнэт хотын Улс төр боловсролын академид “Төрийн удирдлага” мэргэжлээр мэргэшиж суралцсан. Хөвсгөл аймгийн ИТХ-ын төлөөлөгч, Мөрөн сумын МАН-ын даргаар ажиллаж байна.
