Өнөөгийн нийгэмд охид олон төрлийн нүүрний хувирлыг будалтаар харуулдаг болсон. Тиймээс энэ удаагийн “Өөр зочин” булангийн зочноор нүүр хувиргагч Ц.Даваасүрэнг урилаа.-Нүүр хувиргагч мэргэжлийн юу нь таныг илүү татав?
-Юуны өмнө та бүхэнд энэ өдрийн мэндийг хүргье. Би “Mаke up artist” мэрэгжилтэй. Нүүр хувиргагч хийхээс гадна “Сити” их сургуулийн жүжигчний III курст суралцдаг. Багаасаа зурах дуртай байсан. Энэ нь намайг нүүр хувиргагч болоход их нөлөөлсөн гэж боддог. Арван жилийн урлагийн үзлэгээр ангийнхаа хүүхдүүдийн нүүрийг будна. Тухайн үед ангийнхан маань намайг их магтаж гоё буддаг гэж байсан нь урам өгсөн.
Сургуулиа төгсөөд жүжигчин болно гээд Кино урлагийн дээд сургуульд очиж нүүр хувиргагчийн анги байдгийг мэдээд Д.Дагирмаа багшийн ангид орсон. Багшийн маань хувьд Монголын кино урлагт олон жил зүтгэж яваа сайн нүүр хувиргагч нарын нэг юм. Хүн өөрийнхөө хүссэн зүйлээ хийж байж л ямар нэгэн амжилт гаргадаг гэж боддог. Тэр тусмаа мэргэжил сонгох тал дээр бусдын зөвлөгөөг дагах биш өөрийнхөө хамгийн сайн хийдэг зүйлийг сонговол амжилт гаргана.
-Нүүр будалт нь дотроо хэдэн төрөлтэй вэ. Энэ будалтуудын хэдийг нь та хийдэг вэ?
-Миний эзэмшсэн мэргэжил бол киноны нүүр хувиргагч г. Залуу хүний хувьд бүх төрлийн будалтыг хийж сурахыг хичээж дахин суралцахад хэзээд бэлэн. Нүүр будалтыг beauty, stage, special гэж ангилдаг. Beauty будалт нь охид өдөр тутмын, special нь кинон дээр тусгай эффект ашигладаг. Харин stage нь тайзны будалт юм. Өөрийгөө мэргэжлээ бүрэн гүйцэд эзэмшсэн гэж хэлэхгүй. Өдрөөс өдөрт нүүр будалт урлаг болтлоо хөгжиж байна. Нүүр будалтаар залуу хүнийг хөгшрүүлж, хөгшин хүнийг залуужуулж байна. Энэ нь миний мэргэжлийн бахархал юм. Би арт чиглэлээр будах дуртай. Нүүрэн дээр зурдаг будалтыг илүү сонирхож хийдэг.
-Мэргэжлийн хүний нүдээр харахад охид, бүсгүйчүүд маань хэр зөв будаж байна вэ?
-Монголын уур амьсгал хуурай. Ийм ширүүн уур амьсгалтай оронд амьдарч байгаа охид эмэгтэйчүүд арьсаа дутуу арчилж, чийгшүүлэх бэлдмэл бага хэрэглэдэг. Энэ нь будаг шингэдэггүй муухай харагдах эх үүсвэр болдог. Тиймээс эхлээд арьсаа сайн арчлаад сурчихвал дараа нь нүүр будалт гоё болдог онцлогтой.
Охид будаг шингэхгүй байна гэж их асуудаг. Нүүр будахад суурь маш чухал. Эхлээд суурь будалт маш чухал арьсаа хатгалттай чийгшүүлж байж будалтаа эхэлнэ. Суурь будалт жигд болж байж тэр хүний арьс, нүд, хөмсөг нь жигд харагддаг. Хүмүүс суурь будгаа их тод хийдэг нь буруу. Өнгөрсөн жил тод будалт трэнд болж байсан. Харин энэ жил натурал, будсан ч будаагүй мэт харагдах будалт давамгайлж байна.
-Монгол Улсын нүүр хувиргагч “Make up artist”-тууд таны бодлоор хэр сайн буддаг бэ?
-Гадаадад сурч ирээд Монголд сургалтаа явуулж байгаа Хос-Эрдэнэ гэдэг мундаг хүн байдаг. Тэр багш маань олон хүнийг сургасан. Киноны нүүр хувиргалтаараа хамгийн сайнд тооцогддог. Энэ хүнээс их зүйлийг суралцдаг. Миний хувьд Хос-Эрдэнэ багш Монголын шилдэг артист. Мэдээж өөр олон чадварлаг хүн байгаа.
-Та жүжигчин мэргэжлээр суралцдаг гэсэн. Кинонд дүр бүтээв үү?
-Одоогоор бүрэн хэмжээний кинонд тоглоогүй. Харин богино хэмжээний кино, дууны клипэнд тоглосон.
-Тэмцээн уралдаанд оролцсон уу?
-Тэгэлгүй яах вэ. Чадах чадахгүй нь хамаагүй тэмцээн уралдаанд орж өөрийгөө заавал сорьж үе шаттайгаар мэдлэгээ дээшлүүлэх хэрэгтэй. Манай сургуулиас зохион байгуулдаг “Сүнсний баярт” зориулсан тэмцээнд оролцож шилдэг нүүр хувиргагч болсон нь сайхан мэдрэмж төрүүлсөн. Түүний дараа “Сezzena” хэмээх тэмцээнд оролцож байсан. Эхний шатанд нь жүжигчний ангийн хүүхдүүдтэй хамтарч богино хэмжээний кинонд тохирсон будалт хийж оролцсон. Хоёрдугаар шатандаа шууд билет сугалаад тухайн сугалсан материалдаа тулгуурлан будалт хийсэн. Миний хувьд хөгшрөлт хийж байсан. Ямар нэгэн тэмцээнд оролцож байж л тухайн хүн хөгждөг гэж боддог.
-Халдварт өвчнөөс урьдчилан сэргийлэх үүднээс охид амны хаалт их зүүх болсон энэ үед ямар будалт хийвэл зохимжтой вэ?
-Амны хаалт зүүснээр нүүр хуурайших, тослогтох, нүхжилт үүсэх нь ихсэж байгаа. Мөн нүүрний арьс маш эмзэг болж байгаа болохоор охид, бүсгүйчүүд маань будахгүйгээр нүүрний арьс арчилгаандаа илүү анхаарах нь зүйтэй болов уу. Зайлшгүй будах шаардлагатай бол хөнгөн будалт хийж нүд, хөмсгөө тодруулж будах нь илүү тохиромжтой.
-Нүүр будалтын талаар дүгнэж хэлбэл?
-Охид, бүсгүйчүүдийн өөртөө итгэх итгэлийг нүүр будалт бий болгодог. Мэргэжлийн түвшинд биш ч гэлээ нүүрээ будаж арьсаа хамгаалаарай. Мөн будалт өдөр тутмын хэрэглээ шиг болсон учраас өөрт тохирсон будалтаа сургалтад сууж мэргэжлийн хүнээс зөвлөгөө авсан нь зөв гэж бодож байна. Хүмүүс надаас зөвлөгөө авч болно. Тухайн хүн өөрчлөгдөнө гэсэн бодолтой бол надаас шалтгаалах бүхэн нээлттэй.
-Цаашид олон сайхан мөрөөдөл, зорилго байгаа байх?
-Мэдээж одоо сурч байгаа мэргэжлээрээ амжилттай төгсөнө. Түүний дараа нүүр будалтын чиглэлээрээ олон улсад суралцах хүсэлтэй байгаа. Сурч ирээд мэдсэн бүхнээрээ Монголын киноны нүүр хувиргалтад том хувь нэмэр оруулна гэж боддог.
Б.Оюунзул
Эх сурвалж: “Зууны мэдээ” сонин
